تستمع الآن

ياسر جلال يكشف عن رأيه في برامج أخيه «رامز».. وموعد تخليه عن لحيته

الخميس - ١٨ يوليو ٢٠١٩

قال الفنان ياسر جلال إنه لا يرى ما يقدمه أخيه «رامز»، تافهًا كما يقول البعض.

وأوضح «ياسر» جلال مقابلة مصورة مع مجلة «هي»، أن «رامز بيعمل برنامج مقالب، والبرامج دي معروفة في العالم كله ليها أشكال مختلفة، وزمان كان فيه الكاميرا الخفية بيقدمها فنانين كبار زي الأستاذ فؤاد المهندس، لكن برنامج رامز بس مختلف، شو كبير مكان مميز، إخراج مميز، مقلب بياخد مساحة زمنية طويلة، وفيه نجوم كتيرة بيحبوا يطلعوا مع رامز، لكن أنا مش شايف إن اللي بيقدمه  تافه، ده وراه جيش كبير جدًا».

وعن نجاح مسلسله الأخير «لمس أكتاف»، وهل كان يتوقعه، قال «النجاح ده بتاع ربنا، الواحد بيشتغل ويسيب الباقي على ربنا.. واللي شدني للعمل هو الورق اللي كتبه الأستاذ هاني سرحان والموضوع كان جديد ومختلف، وكلمة لمس أكتاف جاية من المصارعة ممكن، وكمان جاية من القضية الرئيسية وهي المخدرات اللي ممكن تجيب المجتمع لمس أكتاف يعني تقضي عليه، وكمان عن الحب اللي ممكن يجيب الشخص لمس أكتاف».

ويرى الفنان ياسر جلال أن الأصل في الفن أن يكون هادفًا، مفسرًا «لأن الدراما ولدت من رحم ديني، في احتفال اليونانيين بأعياد الآلهة، وكانت نوع من التطهير، فلازم تبقى هادفة، لكن طبيعة الهدف مختلفة، فالإضحاك والإمتاع في حد ذاته هدف».

ولا يؤمن الفنان ياسر جلال في البطولة المطلقة أو أن المسلسل ملك نجم أوحد، حيث يقول: «مفيش مسلسل بتاع حد ده عمل جماعي، ولو جينا للأصل المسلسل بتاع الكاتب والمخرج والشركة المنتجة، أحنا جيش كبير حوالي 120 واحد زي لاعيبة الكورة بنباصي لبعض لحد ما نجيب جول وهو ده الهدف».

وكشف ياسر جلال عن أنه يرغب في حلاقة لحيته، لكنه أوضح أنه أداة أو «سلعة» في يد المنتجين والموزعين والذين يريدونه في شكل معين لتسويقه، وأن الفنان ليس حر نفسه بشكل كامل، وأنه يمكن أن يصل لهذا المستوى بعد 10 سنوات وحينها يقوم بعمل شيء ما لـ«مزاجه».


الكلمات المتعلقة‎


مواضيع ممكن تعجبك