تستمع الآن

«خطاب»: تصريحات هاني رمزي تدينه و«المحمدي معندوش رصيد يخليه يتكلم بالعجرفة دي»

الأربعاء - ١٧ يوليو ٢٠١٩

قال كريم خطاب، إن تصريحات هاني رمزي، المدرب المساعد لمنتخب مصر، لم تكن موفقة في محتواها وتوقيتها أيضًا.

وأوضح «خطاب» في حلقة اليوم من برنامج «نجوم إفريقيا» على «نجوم إف.إم»: «هو اعتذر لكن كان بيحاول يخلي مسئوليته، لكنه أدان نفسه، وقال إن أجيري هو اللي اختار اللاعيبة والتشكيل وهو اللي أدار أزمة عمرو وردة من ناحيتنا، وقال إنه اللاعيبة ما كانش عندهم روح وحماس عدا بعضهم، وإنه ما شافش مواصفات القائد في المحمدي».

وتابع كريم خطاب: «أحنا كده بقينا في مدرسة، واللي بيعملوه ده مش منطقي، كأننا في مدرسة ودخلنا دورة رمضانية وخسرنا»، مضيفًا «كنت مستني من ناس عاشوا خبرات كتير كلاعبين زي هاني رمزي إنهم يكونوا حكماء شوية في حتة زي دي، ما شفناش ده في جهاز كوبر أو جهاز برادلي رغم المشاكل اللي كانت عندهم».

وأكد كريم خطاب أن «الكلام ده ممكن يدين أجيري آه، لكن فين دورك كمساعد ليه، ودورك كواحد مصري المفروض تكون حلقة الوصل بينه وبين الدوري واللاعيبة المصريين».

وعن تصريحات أحمد المحمدي، لاعب المنتخب المصري ردًا على ما قاله «رمزي»، بأن «تاريخه أكبر من الرد على هاني رمزي»، حيث قال كريم خطاب: «ما عندوش رصيد يخليه يتكلم بالعجرفة دي، وإن تاريخه لا يسمح له يرد على التصريحات دي، وهو ما لعبش لنادي كبير زي الأهلى أو الزمالك ولا حقق بطولات محلية أو دولية مع الفرق المصرية، والتزامك في إنجلترا هو سبب استمرارك».

وأوضح كريم خطاب أنه لا حديث رسمي بعد عن تشكيل الفريق الفني لقيادة المنتخب المصري، وأن طرح أسماء حسن شحاتة، حسام حسن، حسام البدري، أحمد حسام ميدو، هو مجرد ترشيحات من الجمهور، وكان حسن شحاتة أبرز هؤلاء المرشحين، موضحًا «في تقديري ده استطلاع رأي غير رسمي لجس نبض الجمهور»، مضيفًا أنه تم طرح أسماء أعضاء الفريق الفني مثل «عصام الحضري، محمد شوقي، أحمد حسن، حمادة صدقي».

وأكد «خطاب» أنه «في 2006 و2008 و2010 كانت نسبة عناصر النجاح كبيرة أوي مع الكابتن حسن شحاتة من أول الفريق الكبير جدًا مليان نجوم في كل المراكز واتحاد الكرة كانت أخطاؤه بتوقف عند شخصية حسن شحاتة، لكن دلوقت السن له دور، وكمان اختلاف جيل اللاعبين»، مضيفًا «المدير الفني الجاي لمصر هيعاني ومش عاوزين يكون هو شخص كان أسطورة في تدريب مصر زي حسن شحاتة، ومش عاوز الرقم القياسي العالمي اللي عمله يتكسر بسبب إن الظروف مش مهيأة للنجاح».

كما تحدث كريم خطاب عن الأسماء المتداولة لأعضاء اتحاد الكرة المصري مثل «زكريا ناصف، حسام غالي، عبد الحليم علي، أحمد حسن، علي غيط»، مقترحًا أن يتكون الاتحاد القادم من 4 أفراد إنجليز لديهم خبرات في الاتحاد الإنجليزي أو في دوريات واتحادات أخرى، بالإضافة إلى 4 مصريين يضمون عضوين من الكبار وعضوين من الشباب، ويتم الاتفاق ان هذا التشكيل سيستمر لعامين فقط لتأسيس المنظومة ونقل الخبرات، وبعد ذلك يتم وضع تشكيل جديد بعد استقرار الأمور.


الكلمات المتعلقة‎


مواضيع ممكن تعجبك