تستمع الآن

بسمة: “الممثل ما بيصديش.. ولازم يبقى له آراء في المجتمع حواليه”

الخميس - ٣٠ مايو ٢٠١٩

استضافت المذيعة جيهان عبد الله، اليوم الخميس، الفنانة بسمة، في برنامجها “رسايل”، الذي تقدمه خلال شهر رمضان المبارك، على “نجوم إف.إم” يوميًا الساعة 5 مساءً.

ووجهت بسمة رسالة لجدها السياسي والحقوقي يوسف درويش، قائلة: “وحشتني.. رحيلك ساب فراغ كبير بس أنت دايمًا موجود معانا بحواديتك وسيرتك وبالحاجات اللي علمتهالنا، مؤكدة: “جزء كبير من طفولتي قضيته مع جدي وجدتي في البيت كنت بسافرلهم باستمرار وأنا صغيرة لما كانوا بره مصر، ولما رجعوا كنت بزورهم دايمًا”.

وعبرت بسمة عن رأيها في عمل الفنان بالسياسة، حيث قالت: “الفنان يشتغل في السياسة لأ، خلي السياسة للي دارسين السياسة، لكن يبقى له آراء في الحياة المجتمعية حواليه، الفنان ما ينفعش ينفصل عن المجتمع اللي عايش فيه، لأن ده مش هيخليه غني إنسانيًا بحيث يعرف يمثل أدوار مختلفة”.

ووجهت بسمة رسالة للفنانة نيللي كريم، قائلة: “اتبسطت جدًا بالشغل معاكي.. أحنا نعرف بعض من زمان لكن أول مرة نشتغل مع بعض في (اختفاء).. بحييكي على اختياراتك في السنين اللي فاتت سواء في التليفزيون أو السينما وتستحق كل اللي وصلتي له”.

وعن فترة غيابها عن الساحة الفنية قالت بسمة: “حزينة ومش حزينة لأن أنا عارفة إن في شغلانتنا إن البعيد عن العين بعيد عن القلب فأنا عارفة إن في الفترة دي نزلت كام سلمة، لكن الفترة دي كانت من أهم فترات حياتي لأني جربت فيها يعني إيه أبقى أم وأشوف بنتي بتكبر قدامي وأتعلم أربيها وآخد بالي منها، والفترة دي أثرتني جدًا، وراجعة أمثّل بشكل مختلف لأن فيه تجارب إنسانية جديدة اتضافت.

وأوضحت بسمة أنها درست التمثيل في الولايات المتحدة في اكاديمية الفيلم وكان الأمر أشبه باكتشاف السحر، قائلة: “الممثل ما بيصديش لكن قلة الممارسة بتخليه مزيّق شوية”.

واختارت بسمة عدة فنانات لتجسيد أعمالهم، موضحة: “أحب أعمل حاجة من أعمال شادية خاصة من كتابة نجيب محفوظ، وكذلك أفلام نادية لطفي من كتابة إحسان عبد القدوس، وأيضًا سعاد حسني.

ووجهت بسمة رسالة للمخرج داوود عبد السيد، قالت فيها: “لو في فترة في حياتي حصل فيها طفرة فالفضل ليك ولإيماني وثقتي في اللي أنت بتعمله ويا رب أشتغل معاك تاني”.

وأحبت بسمة أن تكون وزيرة للتعليم، لأنه في رأيها إن التعليم “من الحاجات اللي هتخلي بلدنا تروح لحتت مختلفة، ولو اتربت أجيال كويسة هيعرفوا يشتغلوا كويس ويحاربوا الفقر والمرض”.

ووجهت بسمة رسالة لزوجها السابق السياسي عمرو حمزاوي، قائلة: “شكرًا يا عمرو على إن علاقتنا كويسة وإن أحنا بنحاول نربي بنتنا على أكمل وجه، أنت شخص محترم ونادية محظوظة إنك أبوها”، وكذلك لابنتها: “نفسي تتعلمي تكوني قوية وتعتمدي على نفسك بشكل كبير وتحطي أولويات في الحياة إن اللي هينفعك في دنيتك هي نفسك”.

كما بعثت برسالة للفنانة نجلاء بدر، قائلة: “أنتي شخص عزيز عليا من زمان، وأنا مبسوطة جدًا بنجاحك في مجال التمثيل زي ما كنتي ناجحة في الإذاعة”، مؤكدة إمكانية رجوعها لتقديم البرامج إذا وجدت عرضًا مغريًا.

وعن مسلسلها الذي تم وقفه “أهل إسكندرية”، قالت: “ما تزعلش مصيرك في يوم هتخرج بره العلب، واللي اشتغلوا فيك عملوا مجهود كبير، وعقلي مش مصدق إن المجهود اللي اتبذل هيفضل في العلب”، موضحة سبب وقفه: “في أقاويل كتير بس اللي اتقال وقتها إن المسلسل يسيء لصورة الشرطة”.

كما عبرت بسمة عن امتنانها للمخرج يسري نصر الله، قائلة: “شكرًا إنك كنت أول واحد تشوف حاجة فيا، وأول واحد يقول لي تعالي مثلي، وتجربتي معاه كانت أهم تجربة بالنسبة لي لأنها كانت النقطة الفارقة في حياتي.


الكلمات المتعلقة‎


مواضيع ممكن تعجبك