تستمع الآن

الفنان أحمد كمال: أنا بنسى إني مدرب تمثيل خلال العمل.. ومشكلة الفنانين حاليا هي نقص الثقافة

الخميس - ٠٨ نوفمبر ٢٠١٨

قال الفنان أحمد كمال إن أحد أهم المشاكل الموجودة حاليا بين الممثلين هي نقص الثقافة وعدم الاهتمام بتنميتها.

وأضاف الفنان أحمد كمال خلال حواره مع زهرة رامي ومروان قدري في برنامج “عيش صباحك” على نجوم إف إم “المشكلة بين الممثلين الحاليين هي الثقافة بتاعة الفنان نفسه، يعني ماينفعش تبقى شغال في مهنة الفن ومابتقرأش ومعندكش حب للمعرفة والمطالعة”.

وتابع “أنا في أثناء التصوير بنسى إن أنا مدرب تمثيل إلا لو المخرج طلب مني مساعده فساعتها بساعد وبنعمل بروفات كتير للمشهد وممكن أدي نصائح بسيطة، لكن لو المخرج ماطلبش مابعملش حاجة”.

وعن كاملة أبو ذكري قال “كاملة أبو ذكري مخلصة جدا في شغلها لكن إحنا مابنقدرش نلاحق عليها لأنها ممكن تفضل شغالة 24 ساعة عادي، هي بتهتم بالتحضيرات كتير جدا وده اللي بيفرق في أعمالها”.

وفي سؤاله عن سبب الفرق بين جيله وجيل الشباب الحالي قال “جيلنا أغلبه جاي من المسرح واتربينا بجد. أنا لما بتذكر حياتي السابقة بلاقي إن قضيتها جوه قاعات وندوات وبروفات وشغل فبقيت نوعيتنا شوية عملة نادرة”.

أما عن بدايته مع السينما قال “أنا ممثل مسرح وكنت حابب أستمر كممثل مسرح، وفي ناس كتير كده في أوروبا، بس مشاكل المسرح كتير والشغل بقى قليل ودخله قليل، فعشان كده أجبرت إني أروح للسينما وماكنتش حاببها لحد ما قدرت أفهم اللعبة”.

وعن كيفية اختياره للأعمال الفنية قال “الفيصل بالنسبة لي في إختيار العمل هو الكتابة، العمل نفسه مكتوب إزاي ومين هيخرجه. ومعنديش مانع أخد عمل كان حد غيري مرشح له قبلي، لأن اختيار الممثلين دي شغلانه صعبة جدا”.

وعن فترة البداية للممثلين الشباب قال “البدايات الأولى فيها مفاجأت تلقائية، والتخبيط بتاع الفترة الأولى ده بيطلع منه حاجات حلوه وكويسة”.

أما عن تصنيف الممثلين قال “أنا ضد تصنيف الممثلين لأن ده بيقتل الخيال وبيقتل الممثل، لكن ممكن في ممثل مثلا مايقدرش يعمل كوميديا لأن دمه ثقيل، لكن التصنيف بشكل عام أنا ضده الممثل ممثل”.

وأردف “أنا أساسا ممثل كوميدي من أيام مسرح الجامعة، وبعد كدة الحاجات الكوميدية اللي عملتها قليلة زي “فرح ليلى”. ونوع الكوميديا اللي بحبها زي كوميديا الأستاذ فؤاد المهندس اللي بيدي مساحة للي حواليه وبيدي فرصة للإرتجال”.

وفي سؤاله عن الأفلام التي كان يرغب في المشاركة بها قال “أفلام محمد خان كان له أفلام كتير نفسي أشارك معاه، أنا كنت عملت معاه قبل كده دور لكن كان بسيط”.


الكلمات المتعلقة‎