تستمع الآن

ملابس واكسسوارات يجب أن تتواجد في دولاب كل سيدة

الخميس - ٠٤ أكتوبر ٢٠١٨

تتغير موضة الأزياء كل عام، وتحب أغلب النساء معرفة واتباع أخر صيحات الموضة.

وفي هذا السياق تحدثت الستايلست رانيا محرم عن كل ما يخص موضة الشتاء القادم من ألوان وملابس. وأشارت إلى أنواع الملابس الأساسية التي يجب أن تتواجد في دولاب كل سيدة، وأهمها الفستان الأسود.

وأضافت خلال حوارها مع رنا خطاب في برنامج “بنشجع أمهات مصر” على نجوم إف إم “في شوية حاجات أساسية لازم تبقى موجودة في دولاب كل ست، أهمها وجود فستان أسود سادة وبسيط ممكن يتلبس مع اكسسوار كبير كسوارية وممكن يتلبس على جاكت الصبح في إجتماع شغل”.

وتابعت “كمان لازم يكون عندك Blazer بلون من الألوان الأساسية ولازم يكون عندك جينز سادة غامق ومايكنش مقطع، وبردو اللبس المريح زي الـ sweatpants وجوده مهم وبينفع في مشاوير كتير”.

وعن الألوان المناسبة لكل بشرة قالت “البشرة الغامقة بيليق عليها الألوان الأرضية ودرجات الأحمر، أما الفواتح والباستيل بتليق على اللي بشرتهم فاتحة، والأسود بيليق على كل ألوان البشرات”.

الستايلست رانيا محرم
الستايلست رانيا محرم

وأردفت “اللبس الـoversized بيليق أكتر على الرفيعين لأنه بيزود في شكل الجسم عشان كدة مابنفضلش إن حد وزنة زائد يلبسه، وعشان أبين جسمي أقل، لازم أبقى عارفة اللون والنقشة والقصة اللي ينفعوا معاه. وأفضل حاجة لو وزني زيادة ألبس مقاسي بالظبط مش ضيق أوي ومش Oversized. واللي دراعة مليان مايلبسش حاجة فيها كمام مكشكشة لازم ألبس حجم دراعي مش أوسع. وبالنسبة للبس المقلم بالعرض فهو فعلا بيتخن خصوصا الجزء اللي فوق”.

وعن الموضة في ألوان الأحذية قالت “الأخضر الفاتح mint كان موضة السنة اللي فاتت في الجزم، لكن السنة دي الألوان الموضة هي الفضي والكاشمير والشامبين”.

وعن كيفية ارتداء الاكسسوارات قالت “في الاكسسوارات الحاجات اللي على قد الرقبة زي الـshockers تتلبس على حاجة مفتوحة من فوق، ولو لابسة بلوزة على قد الرقبة يُفضل تلبسي اكسسوار طوله متوسط، لكن في النهاية كل ست ليها زوقها في الاكسسوارات”.

واختتمت “نصيحتي إن مفيش أحلى من البساطة ودايما خلي ليكي ستايلك الشخصي، وبالنسبة للألوان حاولي ماتلبسيش أكتر من لونين ولو حابة تدخلي لون تالت يفضل يبقى في الجزمة أو الشنطة أو ممكن الاكسسوار اللي لابساه يبقى هو اللي لونه يبقى مختلف”.


الكلمات المتعلقة‎


مواضيع ممكن تعجبك