تستمع الآن

التسنين عند الأطفال.. توقيته وأعراضه

الأحد - ٢٢ يوليو ٢٠١٨

يعد التسنين من أكثر المواضيع التي تشغل الأمهات، خاصة الأمهات الجدد. ويختلف توقيت وأعراض التسنين من طفل لآخر.

وقالت نايلة بهجت خبيرة العناية بالأطفال حديثي الولادة إنه من الممكن أن يبدأ طفل في التسنين من سن 3 أشهر وطفل آخر يسنن من 9 أشهر. مشيرة إلى أنه إذا تم الطفل عامه الأول بدون ظهور أي سن يتوجب وقتها زيارة الطبيب المختص لمعرفة السبب.

وأضافت خلال حوارها مع رنا خطاب في برنامج “بنشجع أمهات مصر” على نجوم إف إم “علامات التسنين من ضمنها إني هلاقي الطفل عايز طول الوقت يعضعض أي حاجة قدامه، وترييل رهيب، واضطراب في النوم وبيقوم كتير بالليل وبيعيط، وكمان حدوث تضخم في اللثة”.

وتابعت “ممكن التسنين يحصل معاه حرارة لكن بالكتير 38.2 لكن لو أكتر من كدة يبقى عيان وفي حاجة تانية غير التسنين. الإسهال وحرارة أكتر من 38.2 دول مالهمش علاقة بالتسنين ولازم لو ده حصل أروح لدكتور”.

خبيرة العناية بالأطفال وحديثي الولادة نايلة بهجت

وعن توقيت اكتمال التسنين عند الأطفال قالت “في خلال أول 3 سنين من عمر الطفل المفروض يكون كل الأسنان والضروس باستثناء ضرس العقل طلعوا”.

اأما عن السن المناسب لإطعام الطفل وجبات غير اللبن قالت “ماينفعش أحاول أدي الطفل أكل قبل سن 4 شهور، ولازم يكون ابتدى يقعد مع مساعدة حد، وابتدى يحصل زيادة ملحوظة في وزنه. الدراسات أثبتت إن حاجة نادرة جدا إن كل ده يتحقق مع بعض قبل سن 6 شهور”.

وأردفت “المكان اللي الطفل هياكل عليه يكون الكرسي العالي بتاع الأطفال، وأكون ملبساه بافيته عشان مايوسخش هدومة، والمعلقة والطبق والكوباية لازم يكونوا BFA Free، دي مادة كيميائية بتكون موجودة في البلاستيك، الكبار بيعرفوا يتخلصوا منها لكن الأطفال لأ. المعلقة والكوباية لازم يكونوا مناسبين لسنُة. كمان مهم أقدم المياه للطفل من 6 شهور في كوباية مش في البيبرونة عشان أبدأ أفطمه وأعلمه يبطل البيبرونة”.

وأضافت “كُتر المياه قبل وقتها ممكن يعمل حاجة اسمها تسمم المياه، عشان كدة لازم أديها للطفل في الوقت المناسب اللي هو 6 شهور”.

واختتمت “في حاجة اسمها متلازمة الموت المفاجئ عند الأطفال، وعشان أحاول اتجنبها لازم الطفل ينام على مرتبة ناشفه وأكتر وضعية نوم آمنة الطفل ينام بيها هي إنه ينام على ضهره، ودي مش دايما مريحة للطفل فممكن ننيمة على جنبه وده وضع أمن ومريح للطفل”.


الكلمات المتعلقة‎