تستمع الآن

“بنشجع أمهات مصر”.. أسباب وطرق علاج تسوس الرضاعة عند الأطفال

الخميس - ١٠ مايو ٢٠١٨

قالت الدكتورة هند خالد أخصائي أسنان الأطفال وعضو الأكاديمية الأمريكية لطب أسنان الأطفال، أنه من الطبيعي تواجد مسافات بين الأسنان اللبنية عند الأطفال، مؤكدة أنه لا داعي للذعر بسبب ذلك، وأشارت إلى أن عدم وجود تلك المسافات وتلاصق الأسنان ببعضها يعني أن فك الطفل صغير أو أسنانه كبيرة وغالبا ما يحتاج الطفل إلى تركيب التقويم في تلك الحالات.

وأضافت خلال حوارها مع رنا خطاب في برنامج “بنشجع أمهات مصر” على نجوم إف إم: “من أكتر مشاكل الأسنان المشهورة عند الأطفال هي تسوس الرضاعة. اللي بيحصل في النوع ده من التسوس إن الأسنان فيها بكتيريا طبيعية ولما بيجي عليها الأكل أو اللبن ويفضل موجود فترة وخصوصا إن اللبن في نوع من السكريات، بتبدي البكتيريا تشتغل على الأكل وتعمل أحماض بتسبب تسوس”.

هند خالد ورنا خطاب
هند خالد ورنا خطاب

وعن طرق العلاج والوقاية من التسوس قالت: “أحيانا بنعمل طبقة من الفلورايد على أسنان الأطفال وبتتجدد كل 6 شهور لحمايتها من التسوس لكن ده مايغنيش عن غسيل الأسنان وأهميته”.

وأضافت: “أول حاجة بتتبدل هي الأسنان اللبنية اللي تحت، ومفيش سن محدد للتبديل لكن لو لحد 8 سنين الطفل مابدلش ساعتها بنروح للدكتور وبنعمل أشعة على الفك اسمها بانوراما”.

وعن التوقيت المناسب لبداية زيارة طبيب الأسنان قالت: “لما الطفل يتم سنة المفروض الأم تاخد الطفل لدكتور السنان عشان تطمن إن كل حاجة ماشية طبيعي وتعرف إزاي تحافظ على أسنان الطفل وإزاي تغسلهم كويس”.

وتابعت: “فيتامين د مهم الطفل ياخده، أما الكالسيوم فالناس بتديه للأطفال عمال على بطال ماينفعش ندي كالسيوم غير لو الطفل عنده نقص فعلا في الكالسيوم غير كدة غلط. أي حاجة بناخدها بزيادة بتأثر على الكلى”.

وفي نصيحتها للأمهات قالت: “لازم الأمهات تركز على الأكل الطبيعي زي الخضار أهم من التركيز على الفيتامينات. يفضل ندي للطفل الفيتامين اللي محتاجه في صورة أكل طبيعي مش أدوية”.


الكلمات المتعلقة‎


مواضيع ممكن تعجبك